Standardizuyimi romani qhib

Anglovakaripa

I Romani qhib si e Romengi qhib, kolaya vakarena o Roma sar dayaki qhib. Oy phiravdili e Indiyata thay adive arakhlola ano sa Sumnal.

Najanelpe kana o Roma lele te vakaren akaya qhib, numay najanelpe ni angluno manush koya qhib vakarya. Odoleske, shay te phena so i Romani qhib si yekh may purani e qhibyenda. Ji adive janelpe so i Romani qhib phiravdili numay muyesta po muy thay na janelpe olako hramipe sar sine. Amen pakya so i Romani qhib, vi angleder hramisali, numay amen najana sar. Nani khonik ko te mothavol amenge odova.

Zumavinde but jene te keren i Romani qhib te ovel hramimi, numay ji adive panda na resla ko than kote manglape te ovol. I Romani qhib panda ji adive na dikhla dud sar so dikhena yaver qhiba, odoleske, shay te phena so i Romani qhib panda si ani tomina
thay ajukarela ko ka tharol olako dud.

Ji adive, zumavisalo te kerolpe i Romani qhib agyahar so sa o diyalektya te oven qalarde. Sakova alav e diyalektesko te hraminyol thay sako te drabarol agyahar sar vakarela. Numay, sar si Romane diyalektya but a mashkar olende but lokalizmya, akava sistemi ji adive na pherya odova so ajukardilo. Akava sistemi but pumushkarya i Romani qhib te hraminyol, thay amen manglape te palikera sa odole manushenge so kerde thay kerena buti vash te hraminyol i Romani qhib.

Adive, akava si vash amenge thay yaver generaciyenge, kola ka aven pala amende, yekh drom, kotar manglape te nakha angle thay sa so arakha vash te lokyaryol e romana qhibyako hramipe, manglape te mothava thay but harne vakteste vi i Romani qhib ka hraminyol sar so hraminena o yaver manusha para dayaki qhib.

Amen vash te kera amaro kotor e butyako vash Romani qhib, lelem yekh yaver metoda e butyaki, kolaya hraminena vi yaver qhiba, kola sar baza na lele o diyalektya numay e qhibyaki gramatika, soske i qhib siklolape kotar qhibyaki gramatika. Odoleske vi amari qhibyaki gramatika therela yekh sistemi kola manglape sare te kama thay te hramina agyahar sar sikavela amend i gramatika.

Selahetin Kruezi

http://kosovoroma.files.wordpress.com/2008/03/standardizuyimi1.pdf